អង់គ្លេស៖ ក្លិបបាល់ទាត់ Luton Town កំពុងសម្លឹងរកការវិលត្រឡប់សាជាថ្មីមកកាន់ក្របខណ្ឌលីគកំពូលអង់គ្លេស ពោលគឺបន្ទាប់ពី ៤០ឆ្នាំគត់ក្រោយការកាត់ចេញពីក្របខណ្ឌកំពូលរបស់អង់គ្លេសនៅឆ្នាំ១៩៩២។ ជ័យជម្នះដ៏ធំបំផុតចុងក្រោយនៅកីឡដ្ឋាន Wembley គឺជាជំនួបដែល Luton យកឈ្នះកាំភ្លើងធំ Arsenal គ្រងជើងឯក League Cup នារដូវកាល ១៩៨៧/៨៨ ខណៈយប់នេះ Luton នឹងត្រូវការជ័យជម្នះសាជាថ្មីម្តងទៀត ដើម្បីបង្កើតប្រវត្តិសាស្រ្តក្នុងយុគសម័យបាល់ទាត់ទំនើប English Premier League របស់អង់គ្លេស។

គួរបញ្ជាក់ថា ក្លិបបាល់ទាត់ Luton Town ត្រូវបានកាត់ចេញពីក្របខណ្ឌកំពូលអង់គ្លេសនៅឆ្នាំ១៩៩២ ពោលគឺមួយឆ្នាំមុនពេលដែលលីគកំពូលអង់គ្លេសវិវត្តន៍មកជា Premier League និងជាលីគមានប្រជាប្រិយភាពបំផុតលើពិភពលោកនាពេលបច្ចុប្បន្ន។ ក្រោយមកក្លិបមួយនេះបានជួបប្រទះនឹងបញ្ហានានា ជាពិសេសទៅលើបញ្ហាហិរញ្ញវត្ថុ រហូតធ្វើឱ្យក្លិបត្រូវបានកាត់ចោលរហូតដល់លីគទីបួន និងរហូតដល់របូតចេញពីប្រព័ន្ធបាល់ទាត់អង់គ្លេសនៅឆ្នាំ២០០៩។ 

គួរបញ្ជាក់ថា ក្លិបបាល់ទាត់ Luton Town បានចំណាយពេលចំនួនប្រាំរដូវកាលនៅលីគទី៥របស់អង់គ្លេស មុនពេលដែលវិវត្តន៍ខ្លួនជាបន្តបន្ទាប់ហើយក្លិបត្រូវការអព្ភូតហេតុត្រឹមតែជ័យជម្នះមួយប្រកួតទៀតតែប៉ុណ្ណោះទល់នឹង Coventry City ដើម្បីទទួលបានឱកាសឡើងមកបង្ហាញខ្លួននៅពានរង្វាន់លីគកំពូលអង់គ្លេស English Premier League នារដូវកាលក្រោយ។ 

ដោយឡែក គូប្រជែងរបស់ Luton Town ក្នុងការដណ្តើមកៅអីមកកាន់ Premier League នាយប់នេះគឺ Coventry City ដែលបញ្ចប់នៅចំណាត់ថ្នាក់លេខ ៥ ក្នុងក្របខណ្ឌ EFL Championship រដូវកាលនេះ និងបានទម្លាក់ Middlebroughs នាវគ្គ Play-off។ Coventry City បង្ហាញខ្លួននៅក្នុងក្របខណ្ឌ Premier League ជាលើកចុងក្រោយតាំងពីរដូវកាល ២០០១ មកម្ល៉េះ ដែលមានន័យថា Coventry City រង់ចាំឱកាសនេះជាង ២ទស្សវត្សមកហើយ។ 

ការប្រកួត Final Play-off ដណ្តើមកៅអីមកកាន់ Premier League រវាង Luton Town និង Coventry City នឹងធ្វើឡើងនាវេលាម៉ោង ១០ៈ៤៥នាទីយប់នេះ ខណៈអ្នកឈ្នះនឹងទទួលបានកៅអីឡើងមកកាន់ Premier League រដូវកាលក្រោយជាមួយ Burnley និង Sheff United រួមជាមួយប្រាក់រង្វាន់ ១៧០លានផោន (ស្មើនឹងប្រមាណជា ២១៤លានដុល្លារអាមេរិក)៕